viernes, 16 de diciembre de 2011

Tailerra martxan


Gaur izan da SLUN11 tailerra, software librea unibertsitatean jardunaldien barruan. 40 lagun elkartu gara Blenderri buruzko tailerrean, nik zuzendu dudana. Ideia zen Blender programa erabiltzen hastea, eta horretarako proposatu dut kubo batekin jolastearen ideia, modelizatzeko erraza delako, eta Blenderrek ematen dituen aukerak esploratzen hasteko modu bat delako.

martes, 13 de diciembre de 2011

Zinea hiru dimentsiotan


3D. Dagoeneko ohitu gara. Gaur egun, pelikula asko ikus ditzakegu 3d-n zinema komertzialetan. Ez dira urte asko hasi zela oraingo 3d moda. Egia da kontu zaharra dela hiru dimentsioko zinema, eta egia da tradizionalki ez duela arrakasta handirik izan. Ondo dago pelikula bat hiru dimentsiotan ikustea, baina pelikularen erakargarritasuna horretan bakarrik oinarritzen bada, ez zait iruditzen seinale ona dela. Iritzi pertsonala da.

martes, 6 de diciembre de 2011

Blender tailer batean


Abenduaren 16an, EHUren Donostiako kanpusean, Blender programari buruzko tailer bat zuzendu behar dut Software Librea Unibertsitatean izeneko jardunaldi batean. Programa askori buruzko tailerrak (saioak... nik zer dakit) egingo dituzte, eta niri eskatu didate Blenderri buruzko bat antolatzea.

Ordu eta erdi.

domingo, 4 de diciembre de 2011

Bad3Di, urtebete


Atzo, abenduaren 3an, urte bat egin zuen blog honek. Zorionak, blog!!!

Garaia da atzera begiratzeko, eta balorazio txiki bat egiteko. Egia da ez duela aktibitate handirik izan, batez ere, azkenaldian, Darwinformatika animazioa bukatu nuenetik. Alde batetik, opor txiki batzuk izan dira, eta, bestetik, gauza berriak probatzen aritu naiz (ez denak arrakastatsuak).

domingo, 6 de noviembre de 2011

Elkarrizketa HABErako


Elkarrizketa bat egin didate HABE aldizkarirako, eta dagoeneko sarean dago. Blogaren hasierari buruzkoa zen, zertarako erabiltzen dudan eta abar. Iker Barandiaranek egin zidan elkarrizketa, eta transkribatzeaz gain, audioaren zati bat ere zintzilikatu du.

Nahi duenak, beraz, hantxe ditu nire hitz batzuk...

Eskerrik asko, Iker.

lunes, 24 de octubre de 2011

Zerbeza zaila!!

Zer? Zer iruditzen? Garagardo baso-erdi erakargarri bat, ezta?
Ondo. Baina irudi horretaraino iristeko, bide luzea izan zen. Post hau da bide horren historia.
Lehendabizi, garagardoaren likidoa egin behar zen. Ez zen hain zaila. Burbuilek eta gune "gardenek" laguntzen dute garagardo-itxura ematen. Zerbeza tostatua. Mmmm.

domingo, 16 de octubre de 2011

martes, 27 de septiembre de 2011

DosKaballos




Historia polita dauka kotxe horrek. Irauli ezin den kotxea da (bueno... atzeraka azkar zoazela bolantekada bat emanda, dirudienez lor daiteke), horrela diseinatu zutelako. Bigarren Mundu Gerra granja batean ezkutatu egin zituzten prototipo batzuk eta besteak suntsitu zituzten, alemaniarren eskuetatik babesteko (DosKaballos-aren lehengusua, Volkswagenen Kakalardoa gerran erabili zuten bitartean).

jueves, 15 de septiembre de 2011

Monigote baten jaiotza


Monigote bat modelatu dut. Banuen gogoa. Badut buruan zerbait monigotea martxan jartzeko, baina batez ere, probatzeko egin dut, pertsonai baten animazioaren prototipo bezala.

Kontua da erabaki dudala modelizazio-lana sozializatzea, alegia, erakustea nola eman diodan forma pixkanaka. Dakitenentzat, noski, ez da eredugarria (gainera seguro ez dudala modurik erginkorrenean egin), baina ez dakitenentzat kuriosoa izan daiteke gizontxo honen sortze-prozesua. Hurrengo batean bideo bat prozesuaren grabatuko dut, baina hau argazkien bidezko montajetxo batekin osatu dut.

viernes, 2 de septiembre de 2011

Hemolinfa gaztelaniaz


Beharbada lan gehien eman didan animazioa eta orain arteko osatuena "Hemolinfa, odol berdea" dokumental nanoa izan zen. Iazko apirila aldera hasi eta urriaren 15ean bukatu nuen (ON-Zientzia lehiaketaren lehen edizioarekin koinziditu arazteko). Eta, handik hilabete gutxi batzuetara,  Teknopolis telebista-saioko Manex Urruzolaren laguntzarekin, gaztelaniazko bertsioa ere osatu genuen. Eta nire ordenagailuaren hondo ilunean geratu zen.

sábado, 27 de agosto de 2011

Nire txakurra


Behin eskatu zidaten logo bat diseinatzea, txakur-denda berri baterako. Ni ez naiz profesionala, baina logo bat egin nezakeen; beharbada ez munduko logorik onena, politena edo eraginkorrena, baina saiatu nahi nuen. Marrazteari ekin nion, eta arkatzezko marrazkitxoen artean, aprobetxa zitekeen zerbait atera zen.

lunes, 8 de agosto de 2011

domingo, 17 de julio de 2011

I. Elhuyar Batel Ikurriña



Logo bat egin dut arraun ikurriña baterako. Estropada oso amateur bat. Elhuyar Fundazioaren lehen batel ikurriña, Zumaian herenegun izandako estropada. Ez da Elhuyar Fundazioak benetako arraunlarientzat antolatutako estropada bat, ez. Elhuyarko langileak berak izan dira arraunlariak, esku eta ipurdietan kailurik ez duen jendea!!! Zorionez, ez ginen behartuta parte hartzeko!!

Nire ekarpena logoa da. Oso logo tradizionala... arraun kluben logo tipikoen kopia moduko bat. Eta bideotxo honetan logo horrekin egindako animazio azkar bat egin dut.

jueves, 14 de julio de 2011

Zer da ekliptika?



Berriz ere astronomia!!!
Egia da. Baina azkena izango da denboraldi batean.

Kontua da animazio txiki hau neukala esku artean, eta blogean jarri nahi nuela. Oso-oso azkar egindakoa da; ez dago material eta textura sofistikaturik, ezta modelizazio landurik. Pilota pare bat eta plano bat; oinarrian hori da. Eta hamabi segundo, besterik ez.

miércoles, 22 de junio de 2011

Birus erraldoia


Joan den urtean, birus erraldoi bati buruzko artikulu bat idatzi nuen Elhuyar aldizkarian. Kontua interesgarria zen, birus bat izateko handiegia zelako, eta bakterio bat izateko txikiegia... bueno... hor nonbait. Eta horrekin batera, biziaren mugaren kontua zegoen, oro har esaten baita bakterioak bizirik daudela, eta birusak ez... Birus erraldoi hau muga horretan dago, ez dago argi zein aldetara. Bueno; dibulgaziorako txollo bat da bitxoa.

miércoles, 15 de junio de 2011

Nire eklipsea, nire Ilargia



Etxeko balkoiak orientazio ezin hobea du Ilargi betea ikusteko. Eta gaur zen egun aproposena. Baina, noski, gau honetantxe, in this very night, Ilargia ez zen ikusten. Zer egingo diogu, ba? Ilargi-eklipse bat, munduko edozein tokitan gertatzen da Lurra Eguzkia eta Ilargiaren artean jartzen denean. Baina hemen ez. Hemen eklipsea gertatzen da hodeiak tartekatzen direnean gu eta Ilargiaren artean. Eta gaur eklipse osoa zegoen. Lainotuta zegoen.

miércoles, 27 de abril de 2011

Pulgoia, bigarren saioa

Ea... ez zen batere erraza ikustea nire pulgoi hegalaria hiru dimentsiotan (egia esan, ez da erraza hau egiten ordenagailu btaen pantailan!). Beste bertsio bat prestatu dut. Agian, honekin errazagoa da.
Nik, behintzat, oraingoan nahiko erraz ikusten dut. Pantaila txikia dut, 13 hazbetekoa... agian, horregatik egiten zait erraza. Nire sudur-punta gutxi gorabehera 15-20 zentimetrora jarrita ikusten dut. Gertuago jarrita, hobeto. Errazago. Bueno... hori, eta aurreko sarrerako argibideei jarraituta, noski.
Ala!

sábado, 23 de abril de 2011

Pulgoi bat, fantasia bat

Hemen duzue; pulgoi bat, afido bat (biologoek esaten duten bezala). Egurra landu du ontzi moduko bat egiteko, lokarri batzuk lotu dizkio, eta baloi batekin aireratu da. Iujuuuuuu!!!

sábado, 16 de abril de 2011

Nire kontaktua


Eneeeee...

Nabaritzen da ni ez naizela oso blogari ona... Ia bost hilabete dira bloga ireki nuenetik, eta oraindik ez dut gehitu nire kontaktuaren berri. Alegia, ezagutzen ez nautenek ezin dute nirekin kontaktatu, ez bada komentario baten bitartez.

Mea culpa.

martes, 29 de marzo de 2011

Puzzle bat


Ez nintzen gogoratzen bideotxo honekin.
Bartzelonan egin nuen. Uau! Bartzelona...!! Horrela esanda, ematen du 3D diseinua egin dudala hiri handi eta kosmopolitetan!! Gaur Moskun, bihar Buenos Airesen, gero enkargu bat Bartzelonan... Ba, ez. Kongresu batean ginen. Elhuyarkoak geure buruaren publizitatea egitera joan ginen, zientziaren komunikazioari buruzko kongresu batera. Galmourrik gabeko bidaiatxo bat. Hori bai, stan bat geneukan (ez dakit nola idazten den "stan"... "txiringito" hitza erabiliko dut). Eta jendea bertara erakartzeko, oparitxo bat eraman genuen, dohain hartzen diren jostailutxo bat. Puzzle hau zen. Egurrezko zazpi pieza, kubo bat osatzeko.

domingo, 20 de marzo de 2011

Horrela bai


Txorakeri bat.
Horrela bai euskaldun topikoa izan naiteke.

lunes, 7 de marzo de 2011

Itsaso puska bat


Animazio txiki bat. Pare bat orduko kontua, gutxi gorabehera. Proba bat da, besterik ez. 

Modeloa plano bat da, bi texturekin eta uhinen simulazio bat. Texturek olatuak sortzen dituzte, eta mugitu egin ditut, errealismo pixka bat emateko.  Uhinaren anplitudea eta abiadurarekin jolasten moldatzen da marejada handiagoa edo txikiagoa izatea.

Bideoa proba batzuen emaitza da. Askotan probak egiten dituzu proiektu handiago batean erabiltzeko, edo abiapuntu bezala edo teknikak probatzeko. Eta askotan, proiektu handiago hori ez da aurrera ateratzen, baina merezi du probaren emaitza ikustea.

Hau da itsaso puska bat. Ez dakit beste zerbait handiago aterako den hemendik edo ez, baina proba ondo geratu da. Itsaso puska bat kristalezko ontzi batean sartuta. Lehen proban nahiko itsaso lasaia atera zait, baina gero lortu dut marejada kutu hori sortzea. Hamar segundo irauten duen marejadatxoa da, baina fijo begiratuta, zorabiatzeko moduko mugimendua da.

miércoles, 2 de marzo de 2011

Ilargiratzen


Badakit... hilabete bat izan da blogean ezer sartu gabe... Nire zazpi jarraitzaileak zai egongo dira... hau responsabilitatea!! 
Bloga agian bai, baina 3Dko animazioa ez dut abandonatu. Hilabete honetan gauza asko egin ditut; tartean, animazio hau. Soinua jarri nahi nion... eta saiatu naiz!! Baina ez dut izan denbora eta pazientzia izan ditudan arazoak gainditzeko. 

.
Bueno... azken batean, espazioan ez dago soinurik... jeje.. horrela koherentea izango naiz fisikoki bideo honetan!! Hori bai... bukaera leherketa baten soinua ez zen batere gaizki egongo. 

Bueltan nago "on the road".

jueves, 3 de febrero de 2011

Ibiltzen ikasi 1


Ez da hain erraza. Ez dakigu ibiltzen jaiotzen garenean. Urtebete behar izaten da ikasteko, gutxi gorabehera. Eta animazioan, ez dakit zenbat denbora behar den, baina gauza bera da... luze jotzen du ibiltzen ikasteak.

Horrek ez du esan nahi txiripaz ezin duzinik asmatu animazio duin bat sortzen. Baina behin bakarrik asmatuta ezin duzu esan ibilkerak animatzen dakizunik. (Niri gertatu zait!!).

domingo, 30 de enero de 2011

Taula periodikoa zizelkatu


Elementu kimikoei buruzko artikulu baterako zen irudi hau. Elementu berri bat identifikatzen edo isolatzen edo sortzen duenak izena emateko "eskubidea" du, nolabait. Alegia, taula periodikoan sinbolo berri bat idazteko aukera izango du. Hortik izenburua... taula periodikoan izen bat zizelkatzearen kontua.

Hori ilustratu behar zen... Pixka bat kostatu zitzaidan... ulertu nuen arte onena izango zela mugarik gabeko azalera batekin jolastea. Bukaerako irudia ikusita erraza edo ebidentea dirudi ideia hori, baina ez zen. Kostatu zitzaidan.

domingo, 23 de enero de 2011

Rubik-en tentazioa


Aste honetako goiz batean, Rubik-en kubo bat azaldu zen hamaiketakoa egiten dugun tokian. Eta, klaro, munduaren zentroa bihurtu zen. Tranpa bat da. Tentazio bat. Hamar segundotan, baten batek eskuan zeukan (ez dut esango zeinek).

Ikaragarria da, irekitako patata poltsa bat bezalakoa da. Kuboa behin ikusita, ezin da mahai gainean utzi jabea azaldu zain. Deitu egiten zaitu. Erakarri egiten zaitu. Ikutu behar duzu. Kubitoei gutxienez pare bat buelta eman arte ezin duzu eskutik kendu.

sábado, 15 de enero de 2011

Ardibuelta


Animazioak egiteko modu asko dago. Hau da bat. Joko bat. Txorakeri bat, egia esan. Ordenagailuaren txoko ilun batean aurkitu dut; ez nuen gogoratzen sakoneko karpeta horietan argazki-sekuentzia hau bazegoela.

Ardi baten panpina da lurrean utzita. Kamara hartu eta 28 argazki egin nizkion inguruan buelta bat eginda. Ez nuen zaindu argazki bakoitzaren posizio aurrekoarekiko, gutxi gorabeherako proba bat nahi nuen, besterik ez. Suposatzen dut onena dela tripode bat erabiltzea argazki bakoitzaren posizioa kalkulatu ondoren. Ez nuen horrelakorik nahi. Gainera, 28 argazki egin nituen, eta hori oso gutxi da animazio leun bat lortzeko. (Momentuan 28 zenbaki handia iruditu zitzaidan, baina bideoa ikusi besterik ez dago ulertzeko ezetz).

lunes, 10 de enero de 2011

Las Meninas, barrutik


Velazquez harrigarria da. Ez da historia edo arteko liburuen kontua bakarrik. Merezi du haren koadroak lasai begiratzea eta aztertzea. Ikusi duzue Felipe IV.aren erretratuak? Zaila da gizon itsusiago bat topatzea; Velazquezen pintzelak, aldiz, errege baten portea ematen diote, hala ere, jatorrizko itxura penagarriari ihesik egin gabe. Ez dakit zer den hobea Velazquezengan, pintore ona izan zela edo pintore ausarta izan zela.

martes, 4 de enero de 2011

Anubis 3.0



Duela hilabete gutxi batzuk, Dani Fano marrazkilari handiak Anubis 3.0 komikia bukatu zuen. Arimarik gabeko jendearen istorioak marraztu ditu, eta Xabiroi aldizkarian argitaratu du atalka. Haren bigarren istorio luzea da TeleATOI komikia bukatu ondoren. TeleATOI salgai dago dagoeneko album batean bilduta. Espero dezagun laster Anubis 3.0 ere formatu horretan kaleratzea!!!

lunes, 3 de enero de 2011

Lizentzia



Ahaztu baino lehen, blog honetako materialaren lizentzia zehaztu nahi dut. Nola ez, lizentzia 3Di baten bitartez adierazi nahi dut...

Nire asmoa da Creative Commons lizentziarekin eskaintzea blog honetan zintzilikatzen dudana, behintzat kontrakorik esaten ez dudan bitartean. Kasu batzuetan, norbaitentzako egindako materiala izango da, eta, kasu horretan, "norbait" horrek erabakiko du nolako lizentzia jarri nahi dion irudi edo bideoari. Beste kasu batzuetan, agian ezin izango dut nik lizentzia zehaztu. Baina bueno; irudi eta bideo gehienentzat, ba horixe: Creative Commons irudiak adierazten dituen kondizioekin. (Irudi hori bera barne!)

Erabiltzen duenak irudiaren jatorria aipatu beharko du. Ezingo du aldaketarik egin. Eta ezingo du saldu edo dirua egin blog honetako materialarekin. Esandakoa: besterik zehazten ez dudan bitartean.

Ariketa bezala, ondo egon da "harrizko" sinboloa 3Dn sortzea. Hemendik aurrera, blogaren lizentzia zehazteko balioko du irudiak, ezker aldean.